Katzensitterin mit vell Härz♡

Grüezi mitenand

Ich bin d Marina, schaffe imene Büro und sitem November 2024 wohni im schöne und ländliche Unterendingen mit mim Ma. Ich bin 31gi und ufem Burehof ufgwachse. Büsis hani scho emmer gha, gliebt und ghegt und pflegt :). Sälber hämer zwöi wisi Büsis und diä haltet eus uf Trab. Sie send johrelang dine gsii und dörfed sit neustem au use und liebets sehr und bringet e hufe müüs hei...

För mech isches wechtig, dass es förs Büsi und de Bsitzer passt, weshalb es persönlichs Kennelere unumgänglich isch. Ded chasch du mir au Tipps und Tricks, passend uf dis Büsi verrote :).

Was chasch du vo mir und mim Service erwarte?

Füettere, Näpfli uswäsche, Katzeklo mache, Streicheleinheite (kein Muss natürlich), Gamingtime ;-), Medis unters Fuetter misch, Besitige vo Mitbringsel (wie Müs, Vögel, Blindschliche und Co.?) Und Reinigung vo notwendige Stellene.

Da ich 100% schaffe, cha ich jewils am morge früeh vorem schaffe und am obig nachem schaffe verbii goh. Leider isches mir öbere Mittag ned möglich.

Söt e Tierarzttermin i de Betreuigsziit notfalls notwendig sie, dueni mir das natürli gärn gäge zuesätzlichs Entgelt irichte.

Falls du no anderi Tier hesch, chömer das gärn zäme aluege.